الأب مجدي علّاوي يعتذر من البطريرك الراعي ويقول له: “بدي إعتذر منك يا صاحب الغبطة ومن كل البطاركة والأساقفة”…ماذا حصل؟

كتب الاب مجدي علّاوي على صفحة سعادة السماء التالي:

“بعتذر بإسم الحب وبطلب الرحمة لولادي.

المجد لله.

كل يوم الصبح بيبلش نهاري مع يسوع نوري وطريقي، دايما إتكالي عليه .

بدي إعتذر منك يا صاحب الغبطة ومن كل البطاركة،الاساقفة والكهنة على كل غلط إرتكبتوا وعلى كل إحراج سببته لإلكن.

بدي إعتذر من الهيئة الإدارية ،المسؤولين ،المتطوعين،

المحسنين ومن كل الموجودين ،إغفرولي أنا الخاطي.

جينا لعندك يا راعينا نحنا ولادك لانك الصوت الصارخ ،ولادنا حقن يحملوا إسم يعرف عنن والعيل البديلة من قلبها حابة يكون عندها ولد يحمل إسمها ،هودي ولادك قاصدينك بركي الوزراء واصحاب المعالي بيسمعوا ندائنا وندائك والإذن بالتبني بيكون حق لولادنا.

من عشر سنين وجمعيتنا بتدفع رسومات وضرايب للدولة مع العلم غير جمعيات معفية ….سيدنا مصاريفنا الشهرية كبيرة بس ولا مرة إعتلنا هم لأن يسوع معنا ومن بداية السنة بوضع على المذبح ورقة بيضاء لمشاريع ٢٠١٨ ،وورقة تانية للميزانية وبكتب شكرا يسوع.

سيدنا بيوتنا صغيرة بس قلبنا كبير ،مبارح طلعت عاشتورة في ولدين زغار ٢ و٦ سنين وكمان ٣ ولاد غيرن ٦-٨-٩ معقول إتركن عالطريق ……شو ذنبن..هيدا مشروع الله .

متل ما قلت سيدنا الكرازة بالإنجيل همنا ومنه منستمد قوتنا ومنكفي مسيرة الحب والرحمة.

شكرا سيدنا والله يطول بعمرك”.