هيك منرجع من عمّر لبنان وغير هيك من كون عم نضحك على بعض

لبنان/ أليتيا (aleteia.org/ar) انا وقفت اكتب وتابع سياسة من كتير زمان، لأن فهمت واتصالحت مع فكرة “فالج ما تعالج” مع هيك تاريخ وهيك حكام وهيك شعب. ولكن، بس تراقب وتسمع وتقرأ على السكت، ولفترة طويلة فعلا ما تغيّر فيها شي بالنسبة للشعب اللبناني، غير الحكي وتنفيس يأس، ومظاهرات ولا وحدة منها كان الها حتى صدى. بتكتشف انو بوصلة الأمل بلبنان جديد اتجاهها خربان.

يا شباب، التغيير ما بيبلش من فوق. ما فيك ببلد متل بلدنا تجي تأسقط نظام، لأن البديل الوحيد والاوحد هو زيادة الفوضى. وهيدا واقع تاريخي. انسولي الفساد، والسرقة والوسايط والهدر والعجز وتدهور العملة المرتقب والسلاح والتزليم، والتعصب والعنصرية…

وجهولنا هالبوصلة على وزارة التربية والتعليم وتخيّلوا معي بقى…

يا سيدي اي دولة بالعالم بدها تفكر بالتغيير والتحسين والبناء بتصب توجهها على ولادها بالمدارس ومن ثم بالجامعات. بتبني منهج معاصر، متطور، حديث، يخلق أجيال جديدة، ما بتلعب داخل الصف “قال المعلم” ولا بتسمع انو “المعلم هو “سيّد الصف” ولا بتربى على احترام مزيّف مبني على الخوف من العقاب..

يا اخي يا جماعة الثورات والنقد والأحلام. تعوا نحلم بجيل ما بيخاف يعبر عن رأيه بالمدرسة، يعبّر عن ذاته، عن افكاره.. جيل بيعرف انو الاستاذ متله متل الدولة هو موظّف يحصل على راتب لخدمة هذا الطالب/المواطن. ومن واجبته احترام هيدا الطالب، المواطن، دون استخدام اي لغة ترهيب وبدون أي عنف لفظي او جسدي.

المدرسة يا اخوان بلبنان هي introduction لفساد الدولة، هي بداية تجنيد أجيال مغسول دماغها بمناهج تعليمية من العصر الحجري، مفادها تبني جيل موظفين لا مبدعين لا قادة لا مسؤولين، غير قادرين على إنهم يفكروا اصلا باي تغيير لأي شيئ بس يكبروا. شو متوقع من أجيال أقنعوها انو الاحترام، هوي انك توقف بس يفوت الاستاذ على الصف! انك ممنوع تعيط للمعلم، للناظر، لمدير القسم، لمدير المدرسة الا بصفة احترام وإجلال ورعب وخوف، وكله بحجة احترام هيبة النظام والتراتبية.. طيب ممتاز إذا عم نحكي تراتبية، هيدا التلميذ هو رب العمل، إذ أن مجموع التلاميذ متضامن بيعطينا المعيل لهؤلاء المحترمين أعلاه. متل ما هي نفسها قصة النواب والوزراء والحكام الخ الخ… هول بيقبضوا من مين؟ من هالمواطنين يلي كانوا يوما ما تلاميذ مدرسة، بيوقفوا بس يفوت الاستاذ، وبينشحطوا من الصفوف بس يخالفوا راي الحاكم الأعلى للقوات التربوية في الصف، وبيوقفوا على الحيطان إذا ما لبسوا بدلة السجن او إذا عبّروا عن شخصياتهم بقصة شعر معينة مثلا او بلون اظافير معين.

يعني أجيال ربيت بهل مستنقع يلي اسمه منهج تربوي مع أساتذة موظفين عم بيعانوا بدورهن من احباط الوظيفة وتفاهة الدخل والخوف المستمر من رميهن في الشارع، غير مبدعين.

انضمّوا إلى هذه الصفحة التابعة لأليتيا لتصلكم أخبار اضطهادات المسيحيين في الشرق والعالم:

ALETEIA

العودة إلى الصفحة الرئيسية