مع كل تقديري ومحبتي لكل الامهات ومنُّن إمي ومرتي… بسّ حابب فشّ خلقي وفضفض اللي بقلبي

لبنان/أليتيا(aleteia.org/ar) أكيد اليوم بعيد الام كل واحد ع طريقتو بيعبّر عن مدى محبتو وتقديرو لإمو مع صورة لست الحبايب وكلمات بتدوّب حنان وأشهرن “إمي يا ملاكي وست الحبايب والشمعة والنجمة” مع كل الصور الإبداعية والبيانية والإنشائية!!!
ومع كل تقديري ومحبتي لكل الامهات ومنُّن إمي ومرتي… بسّ حابب فشّ خلقي وفضفض اللي بقلبي…
يا حبيب الماما تبقى سْماع منها الكلمة ولبوس منيح متل ما بتقلك تما تاخد برد وتمرض…
كول من أكلاتها وتعلّم تكون بيتوتي مش لمن تكون عاملتلك مجدّرة وسلطة ملفوف تطلب delivery وتقهرها…
سْهار معها عالقليلة مرة بالاسبوع… يا خيي مرة بالشهر… شرط ما تكون ساءبت بعرس بنت خالك أو ابن خالتك..يعني إنت سائبها… ناسبها ع شرفها…
ما تهديها طناجر ومقالي وماكينات فرم لحمة وخضرة وعصر فواكه ومكانس وشفط غبرة… هْديها تهذيبك وصيتك الحلو وسمعتك الطيبة ونجاحك بالحياة…
ع فكرة لمن بتجيب ال Carnet وتكون ناجح تذكر إنو هيدي لإلك مش لإمك وما تقللا شوفي شو جبتلك!!
بيناتنا بتحب إمك؟ احترمها وماتحلف بحياتها بين أصحابك وتقصفلا عمرها بزوايا البيت..
وتبقى لمن تلاقي بنت الحلال ما تنسى إنو عندك إم وشوف إمك بعيونك مش بعيون مرتك إلا إذا كانت مرتك بتعاملها متل إمها وانت بتعامل حماتك متل إمك..
بالآخر اذا جار عليك الزمن وضاقت فيك الحالة وغرف البيت وسَكرت بوجهك لا سمح الله وحطيّت “نبع الحنان” بالمأوى لا سمح الله تبقى طل عليها وتذكر إنو عندك إمّ…

بعيّد كل الاولاد اللي بعيّدوا إماتهن مش بس مرّة بالسنة…

العودة الى الصفحة الرئيسية