حداد ٣ أيام في لبنان وتنكيس الأعلام

لبنان/ أليتيا (aleteia.org/ar) اذكر يوم كنت زغير، كان يموت حكّام العرب رحمهم الله طبعاً، كان البلد يعيش حالة حداد وتنكيس للأعلام وتضع التلفزيونات الموسيقى الكلاسيكية الحزينة.

وقتها، ما كان في “دشّ”، وكنّا مجبورين نعيش الألم والحزن مع أشقاءنا العرب، يا ليت هنّي كمان أعلنوا الحداد ونكّسوا الاعلام بسبب اشعالن الحرب بلبنان.

بعدنا كل ما توفّى حاكم عربي منبكي ومن هاشتاغ لهاشتاغ بتولع وسائل التواصل وكأنّو لي توفّى هوّ ابن تنّورين أو العاقورة أو جزّين أو عكار أو…

نحنا شعب منحبّ نشارك الآخر أفراحو وآلامو،

يعني اذا تزوّج جورج كلوني لبنانية، منفرح،

اذا انفجرت قارورة غاز بباريس، منحزن،

عأساس هنّي سئلانين عنّا وطربوش جدنا معلّق بالشانزلزيه.

كل ما إجا موفد اجنبي للبنان، منسكّر الطرقات، وكل ما مرق زعيم، بيوقف البلد،

ايه، هودي كلهن بيحقّلهن، بس إنّو كل يوم عم يموت ناس على طرقات الذلّ بلبنان بسبب سوء حال الطرقات وإهمال الدولة، هيدا بالنسبة لسياسيين لبنان ما خصهن فيه.

إنّو الشعب يوقف ساعات وساعات بعجقة السير من سنين وسنين، وينعمل جسر غريب عجيب هون وهونيك، وكأنّو كل شي تمام، هيدا كمان ما منعيرو أهميّة.

وين الدولة؟ شعار انتشر بلبنان، والسؤال يبقى؟ وين الشعب لي بدو يحاكم لي عم يموتوه ليل نهار؟

وبدل ما ننكّس الأعلام عقصص ما خصها فينا، يا ريت شي تلات ايام حداد على هل شباب لي عم تموت وتقضّي حياتا عل طرقات.

يرحم الجميع والله يساعد هل بلد.

العودة إلى الصفحة الرئيسية