معقول الناس يتدينو تيعملوا أول قربانة؟؟؟ وين الجوهر؟ وين الجوهرة؟ ليش يسوع بدو هيك؟؟!!! زفة ومطعم ولبس متل العروس وهدايا دهب!!!!

لبنان/ أليتيا (aleteia.org/ar)بيقول المثل الشعبي:” ع قد بساطك مدّ إجريك!!!” ومثل ثاني بيقول:” اللي بيعرف حدّو الله يرحم بيّو وجدّو!!!” والأمثال فيها حكمة وخبرة إنسانية كبيرة بيعلموها الكبار للزغار بطريقة مختصرة وحاسمة تتكون قاعدة للسلوك وحسن التصرف بالاوقات الصعبة…
ولبنان عم يمرق بأوقات كثير صعبة وأزمة مالية ومعيشية كبيرة، والحق مش دايماً عالدولة، الناس بيتحملو مسؤولية ظواهر مريضة صارت مفروضة علينا ومكلفة كتير..
كل مرّة بدّك تفوت عالمسبح بيفتشوك لأنو ممنوع تحمل معك أكل أو شرب، يمكن معن حق، بس يمنعوك تفوّت مي للشرب هيدا جنون، لأنو بكل بلاد العالم المي بتكون ببلاش، وما بتنباع ولا بتنحط عالفاتورة بتكون ضيافة المحلّ، الظاهر نسينا بلبنان النبع والنهر والساقية والسبيل والجرة والابريق!!!!
قبل كم سنة كان الأكل يكون بالبيت مع العيلة وبالمناسبات الكبيرة بيكون بالمطعم واذا شي حدا اشترى أكل خالص ع بيتو كل العالم يستغربو وبيقولو حرام مرتو ما بتطبخ بالبيت، اليوم صار الأكل بالمطعم كتير طبيعي والدليفري عالبيت أكتر من طبيعي واللي بياكل ببيتو مش طبيعي!!!
قبل كم سنة كانت أول قربانة تصير بالمدرسة وما كانت تكلف شي،الناس اعتبروها تجارة!!! وطالبوا تصير بالرعية منعاً للمتاجرة وزيادة المصروف عالاهل… اليوم وين صارت؟؟ بعدا أول قربانة أو عرس أو مهرجان!!! معقول الناس يتدينو تيعملوا أول قربانة؟؟؟ وين الجوهر؟ وين الجوهرة؟ ليش يسوع بدو هيك؟؟!!! زفة ومطعم ولبس متل العروس وهدايا دهب!!!!
قبل كم سنة ما كنّا نسمع بحفلات التخرج من المدرسة، يعني قالب غاتو بالبيت وكان يمشي الحال وبكل الأحوال والظروف المحيطة ما حدا يتكلف ويكلف حالو.. اليوم بدّك تعمل ميزانية مش بس للتخرج من الثانوية العامة وقبل الامتحانات الرسميه، في التخرج من الغاردوري والتخرج من الروضة والتخرج من الابتدائي والتخرج من التكميلي….
ما بعرف ليش منشتري مي وعنا مي؟؟!!
ما بعرف ليش صار الأكل الصحي والطبيعي بالبيت مش صحي ومش طبيعي؟!!
ما بعرف ليش بس زادت الاحتفالات الدنيوية بالمناسبات الدينية قلّ الدين وخفّ الايمان؟!!!
ما بعرف ليش بس درجت حفلات التخرج زادت نسبة الأمية بين المتخرجين وارتفعت نسبة العطلجية؟؟!!!
إذا كان مجتمعنا مجتمع عندو تبعية للغرب وبيقلدو بعاداتو وتقاليدو وبيعتبر كل شي “فرنجي برنجي” خلينا نقلدهن بشي منيح: بالاقتصاد والسياسة، بالديمقراطية والحرية، بقيمة الإنسان والإنسانية وحقوق الإنسان والحيوان، بالسلام والفرح، بالعلم والمعرفة والثقافة والفن والأدب والتكنولوجيا….
خلينا نقلدهن بالشغل بذمة وضمير ونظافة الكف والبيئة والطبيعة والأخلاق والبساطة بالعيش والتواضع!!! ونعيش متلن يعني ع “قدّ بساطك مدّ جريك”!!!! ومن دون كلفة وأزمات وويلات…

انضمّوا إلى هذه الصفحة التابعة لأليتيا لتصلكم أخبار اضطهادات المسيحيين في الشرق والعالم:

ALETEIA

العودة إلى الصفحة الرئيسية