أخبار متفرقة
مار شربل: يسوع وحدو يلّي بيضلّ وَفي وأمين
لبنان/أليتيا(aleteia.org/ar)أنا: المجد لله، اشتقتلّك. مار شربل: دايمًا لله، اشتقت إسمع صَوتَك. أنا: بعرف إنّي بعيد، ما عندي لا تبرير ولا عذر مار شربل: قلبك بعيد؟ أو قريب؟ أنا: قلبي؟!… يمكن إجِر بالفلاحة وإجِر بالبور. مار شربل: أوّل مرّة ما بتكون واثق من الجواب! أنا: إنتَ بتعرف كلّ شي عنّي، ليه عم تسألني؟ مار شربل:…
لبنان/أليتيا(aleteia.org/ar)أنا: المجد لله، اشتقتلّك.
مار شربل: دايمًا لله، اشتقت إسمع صَوتَك.
أنا: بعرف إنّي بعيد، ما عندي لا تبرير ولا عذر
مار شربل: قلبك بعيد؟ أو قريب؟
أنا: قلبي؟!… يمكن إجِر بالفلاحة وإجِر بالبور.
مار شربل: أوّل مرّة ما بتكون واثق من الجواب!
أنا: إنتَ بتعرف كلّ شي عنّي، ليه عم تسألني؟
مار شربل: مش إنت بتقول إنّو الحياة حلوة وحلاوتها بصعوبتها؟
أنا: صحيح، بس إنت كمان بتعرف إنو ما عندي مشكلة مع الحياة، مشكلتي هي مع بعض الناس.
مار شربل: يا سميي، للأسف بعض الناس مش دايمًا أوفيا إلنا لأنُّن أصلاً منُّن أوفيا لا لربُّن ولا لذاتُن…
أنا: وما بكونوا عارفين إنُّن عم يئذوا غَيرُن؟!
مار شربل: المهمّ نضلّ نحبُّن. بضعفُن.
أنا: هيدا مش صعف، هيدا إسمو مرض.
مار شربل: يا سميي، النتيجة ذاتها، والمطلوب واحد: نحبُّن.
أنا: أوقات كتيرة هالمحبّة بتكون صعبة وبتوجّع.
مار شربل: إذا كذّبوا عليك لح تكون كذبتُن أقسى من خيانتُن ليسوع؟ وإذا إذيوك لح تكون أذيّتُن مُميتة أكتر من صلبُن ليسوع؟
أنا: مستحيل!!! أكيد لأ…
مار شربل: خلّيك عم تحبُّن، بذكرك بجملة إنت بتضل تستعملها: كم عذّبتنا عندما علّمتنا المحبّة وصلبتنا على مشارف الكَون شهودًا لها.
أنا: ما بقدر إنساها، مِدّلي إيدَك تإمشي…
مار شربل: يللا قوم امشي، حطّ إيدك عالمحراث وما تطلّع لورا.
أنا: يا يسوع شدّ طلوع، ويا عدرا شدّي القدرا. آمين.
مار شربل: يسوع وحدو يللي بضلّ وَفي وأمين… هو وحدو…
تأمّل حواريّ (مع التشديد والتأكيد على تأمّل حواري، لا رؤيا ولا ظهور… فقط تأمّل من الوجدان.) – الأب شربل يوسف ر.ل.م.