دغري وبالمباشر كتب الأبونا: “ما حدا فرض عليك تتزوج وتعمل عرس كبير وما حدا جبرك تتديّن”

لبنان/ أليتيا (aleteia.org/ar) كتب الخوري نسيم قسطون على صفحته:

دغري وبالمباشر…
كل الناس بتعرف إنو بكنايسنا بالمنطقة (عكار) ما في رسوم مفروضة عا شي…
وبتعرف إنو ما حدا بيشارط إذا عطيتو أو ما عطيتو مصاري…
أنا شخصياً بحكي بضمير مرتاح هالكم جملة:

* ما حدا فرض عليك تتزوج وتعمل عرس كبير وأصلاً إذا عملتو بالدَين ما حدا جبرك تتديّن وهيدا قرارك ولازم تتحمّل نتيجتو…
* إذا تزوجت وزواجك فشل ما يعني أبداً إنو السرّ في مشكلة… المشكلة بخيارك أو بقلّة تحضيرك أو بإكتشافك المأخّر لطباع الشخص اللي نقيتو أو حتّى يمكن المشكلة إنّك زهقت لأنّو حتى اللي ما بيتزوجو بالكنيسة في منهم ضلّو مع بعضهم كل العمر وفي منهم صاروا مجوزين ومطلقين كذا مرّة…
* وإذا فشلت ما تحط الحق عاللي جوّزك… الحق أساساً عليك وعاللي تجوّزك اللي ما عرفتو تتحضّرو أو ما عرفتو تكفّو سوا… أكيد بيضل في حالات خاصّة بس مش كل ما زهقو تنين من بعضهم يعني معهم حق!
* ما حدا جبرك تتزوج برّا ضيعتك وتروح عا مطرح يعاملوك كغريب… الغريب إنّك تنقّ وإنتا منقّا مطعم كلاس وزفّة غير شكل وعامل العمايل وما بتغصّ إلا بمطرح واحد…
* إذا مش مقتنع بالكنيسة في كتار غيرك سبقوك عا قبرص أو حتى عا لبنان إذا صار القانون اللي ما حدا ضدّو إذا عالكل… بس ما فيك تتعامل مع الأسرار متل ال”Salade Bar” بتنقّي اللي عاجبك واللي مش عا ذوقك ما بتنقّيه…
إذا فعلاً مؤمن فيك تتجوز مدني بالدولة المدنيّة اللي لهلأ مش موجودة ببلدنا وبترجع تتجوز كنسي متل ما بيعملو كل اللي بيآمنو وين ما كان بهالعالم…
* وعا فكرة… طالما ضد الطائفيّة وأكيد هيدا شي مش عاطل… ليش بعدك قبلان تنتخب بأنظمة اللي بمثلك فيها بيكفي يترشّح حسب طايفتو واو ما بيعرف الأبانا من السّلام؟
* مدني… ليش لأ بدولة كل شي فيها مدني ومش بس ” A la carte”… أو بيصير نظام استنسابي ومش نظام عام!

العودة إلى الصفحة الرئيسية